من طرف فاكرة يا مصر ولا
نسيتي كل اللي ولى
فاكرة يا مصر لما رفعتي العلم؟
فاكرة يا مصر لما شيلتي القلم؟
فاكرة لما محيتي الألم
عن كل قادم يحتمي من هم
أو يترمي في حضنك يا أم.
فاكرة يا مصر ولا
نسيتي كل اللي ولى
فاكرة لما الزرع لخضر
كان كاسيكي كالمظلة
وكانت الفواكه من الجنة
والخضار ما يبات ولا يستنى
فاكرة لما كنتي بتحمي أمة من سنين
يوم ولادك لما قاموا لمغول وصليبيين
فاكرة لما كنتي وردة على الجبين
ليه يا مصر بقيتي مش سامعة الأنين
فاكرة يا مصر ولا
نسيتي كل اللي ولى
فاكرة لما الضحكة كانت تتسمع في الشوارع
فاكرة لما الصحبة تحلي في ألف جامع
لما كنتي شمس منورة وحلم لكل طامع
لما كان الخير فيكي يملى الصوامع
ليه دلوقتي بقيتي شايخة وبايخة وكلك مدامع
فاكرة يا مصر ولا
نسيتي كل اللي ولى
فاكرة لما وقف عرابي
وقام مصطفى كامل خطابي
ومن قبلهم بزمان بناكي حمورابي
وعاش فيكي ولا ألف صحابي
فاكرة يا مصر كل الوشوش الندية
اللي نورت فيكي وسموكي بهية؟
فاكرة لما كل عاشق ليكي اختارك هوية
ليه يا مصر بقينا شايفينك رزية
ونهرب منك على مركب أو طيارة أو عربية
فاكرة يا مصر ولا
نسيتي كل اللي ولى
فاكرة يا مصر لما كانت شوارعك نضيفة
تتكنس وتتمسح لما تبقى قطيفة
لما كان فيكي جناين لطيفة
وكان الحب ناشر فيكي نسمة خفيفة
دلوقتي مطبات صناعية وطبيعية
وأكوام زبالة تحسرنا على الجباية الإجبارية
وحتى لو في شجر بقت أوراقه رمادية
والهوا بقى كله دخان وسحابة سوادوية
فاكرة يا مصر ولا
نسيتي كل اللي ولى
فاكرة لما كنت بتحمي العهود
وتزرعي وتجمعي وتحصدي العنقود
ليه يا مصر ملكتي أكلي لليهود؟
وأكلنا المسرطن والمليان بالدود
فاكرة لما كنت واقفة لكل غازي
جه وعدى ولا نال منك بوغاز
دلوقتي بقيتي بلد الغوازي
وتدي للعدو بالرخيص أغلى غازي
بس أنا لسه عايز أعيش ليكي
ده انتي أمي مدفونة فيكي
وترجع لينا تاني أحلى لياليكي
وأهلك يبقوا فرحانين بيكي
عندي أمل تنفضي المذلة
وتقوم شابة قوية عفية
تبقي تاني أحلى بهية
من أسوان للقاهرة للإسكندرية للمنصوره لشها
ده انتي مصر بلد القلوب النقية
افتكري يا مصر يلا
وما تنسي كل اللي ولى
شكرا
