ابليس على باب السفاره ... وفى ايده استماره

على باب سفارة جهنم .....

لمحت ابليس و ف ايده استماره .....

بقول له على فين .....

قاللي بص .....

يا هجره يا اعاره .....

يا عم زهقت كفرت .....

الاقيش معاك سيجاره .....

انا انتهيت خلاص .....

لا نافع وسواس ولا خناس .....

ولا ليا عيش وسط الناس .....

دي عالم مجرمين .....

عندكوا فائض ف الفساد .....

في كل البلاد .....

ومش محتاجين شياطين .....

مليش عيش ف البلد دي .....

بقالي سنين عاطل .....

و انتوا بتعرفوا .....

تقلبوا الحق باطل .....

و تهربوا القاتل .....

و تمشوا ف جنازة المقتول .....

ومفيش مشاكل .....

يا عم ده انا بقيت أوسوس بالمقلوب .....

و أقول للحرامي كفايه بقى توب .....

انت هاتعمل كل الذنوب لوحدك .....

و أنا ابليس .....

أشتغل واعظ .....

ولا كمسري ف اتوبيس .....

يا عم ده انا زمان .....

كنت باستنى حد ينسى .....

يسمي وهو بياكل لقمته .....

دلوقتي كل اكلكم ملوث .....

و بصراحه الواحد خايف على صحته .....

ده مفيش ضمير اساسا .....

عشان اموته .....

و كل واحد بمزاجه ......

خربانه ذمته .....

يا عم ده كل حاجه اتسرقت .....

وكده الاجيال الجديده اتحرمت .....

ما الحراميه ظلمت .....

يا راجل ده من كتر ما لطشت معايا .....

خرجت ف مظاهره .....

مع الناس اللي بتقول كفايه .....

و برضه مفيش فايده..............